Autoritetet belge kanë rënë në gjurmët e autorëve të dyshuar për vrasjen e taksistit shqiptar, Marko Beka, një ngjarje e rëndë që tronditi opinionin publik disa ditë më parë. Policia ka vënë tashmë në pranga dy persona, të cilët mendohet se janë përgjegjësit kryesorë për vdekjen e 45-vjeçarit.
Gazetari Fatos Mahmutaj në Belgjikë, në një intervistë për emisionin “Në Radio” të Andri Xhahut në Radio Tirana, raporton se ngjarja ndodhi në qytetin Geel, rreth 100 km larg Brukselit, një zonë e njohur për standardin e lartë të jetesës. Viktima, baba i tre fëmijëve, ishte zhvendosur në këtë qytet prej pak vitesh për një jetë më të mirë.
Gjithçka nisi kur Beka mori katër pasagjerë në qendër të qytetit për t’i dërguar në periferi. “Siç duket, taksisti me klientët kanë pasur diskutime dhe janë grindur, ndoshta për shkak të vonesës së taksisë. Grindja e tyre është përshkallëzuar në dhunë. Njëri prej tyre e ka qëlluar me armë taksistin duke i marrë jetën”, shpjegoi Mahmutaj.
Deri më tani, policia ka arrestuar dy prej të dyshuarve, të moshave 20 dhe 24 vjeç, të dy shtetas belgë. Ndërkohë, dy persona të tjerë, po ashtu rreth moshës 24-vjeçare, janë shpallur në kërkim. “Sipas medias belge dhe zyrtarisht nga prokuroria, kemi të bëjmë me një krim të momentit. Puna e taksistëve është e ekspozuar përballë krimit, sidomos gjatë fundjavave kur përballen me klientë të dehur”, u shpreh gazetari. “Shpesh herë kemi dëgjuar, që taksistët në ditët e fundjavës kur kanë klientë të dehur kryesisht, përballen me lloj-lloj problemesh. Puna e taksistëve është një punë e keqekspozuar përballë krimit.”
Kjo ngjarje ka ngjallur indinjatë të thellë në komunitetin shqiptar në Belgjikë, i cili shpesh është përballur me etiketime negative. Vrasja e Marko Bekës shihet si një dëshmi e dhimbshme se shqiptarët në emigrim janë shpesh viktima të dhunës ndërsa punojnë ndershëm.
”Në këtë rast komuniteti shqiptar është viktimë. Kjo tregon se shqiptarët janë si gjithë të tjerët, njerëz të ndershëm që punojnë me djersën e ballit. Babai i tre fëmijëve duhet të ishte në shtëpinë e vet, por u vra në krye të detyrës,” përfundoi Mahmutaj.
