Pas vrasjes së pronarit të anijes së peshkimit “Drita”, 52- vjeçarit Hyqmet Nexhipi dhe arrestimit një ditë më parë të djalit të viktimës, ky i fundit po hetohet edhe lidhur me vrasjen e të atit.
Burime nga grupi hetimor nuk përjashtojnë dyshimin se ai të jetë i përfshirë në këtë ngjarje të rëndë. Ky është një informacion mjaft i rezervuar i dhënë dje nga Policia, por nuk jepen të dhëna të tjera rreth motivit të mundshëm.
Policia e Vlorës bëri të ditur dje se në listën e personave që po hetohen për ngjarjen, ku u vra me 4 plumba viktima, është edhe djali i tij, Olsi Nexhipi.
Ai jeton me të ëmën në një banesë në Vlorë, ndërsa babai i tij, Hyqmeti, jetonte i vetëm, pasi ishte divorcuar prej disa vitesh nga bashkëshortja.
Djali 24-vjeçar i Hyqmet Nexhipit u arrestua për armëmbajtje dhe posedim të lëndëve narkotike.
Sipas të dhënave, policia ka ushtruar kontroll në banesën e tij, pas dyshimeve të bazuara në disa informacione të marra në rrugë operative se babë e bir kanë pasur konflikte së fundmi dhe marrëdhënia e tyre nuk kishte qenë e mirë.
Ai jetonte me të ëmën në një banesë në lagjen “Kushtrimi”, por policia ka shkuar pas ngjarjes për të kryer një kontroll nga ku ka gjetur armë, fishekë e drogë.
Panorama
