Lidhur me vrasjen në rrethana misterioze të lezhjanit në Greqi, Presidenti Bujar Nishani do të thërrasë në një takim Prokurorin dhe Ministrin e Drejtësisë. Kjo u bë e ditur nga Presidenca, pas takimit që Presidenti pati me familjarët e të ndjerit. Në një njoftim nga Presidenca mësohet se Presidenti i Republikës ka ndjekur me shqetësim informacionet e përcjella nga media rreth ngjarjes ku ka humbur jetën në Athinë, Greqi qytetari shqiptarë, Pëllumb Marnikolli.
Në këtë kuadër, përfaqësuesi i Kabinetit të Presidentit të Republikës ka kontaktuar dhe marrë takim me familjarë të të ndjerit ku ka përcjellë ngushëllimet më të ndjera të Kreut të Shtetit për humbjen e jetës së të dashurit të tyre. “Në këtë takim, familjarët e të ndjerit kanë informuar mbi dijeninë e tyre rreth ngjarjes së rëndë të ndodhur në një komisariat të policisë në Athinë dhe kanë kërkuar zbardhjen e kësaj ngjarje. Në këtë kontekst, përfaqësuesi i Kabinetit shprehu angazhimin institucional të Kreut të Shtetit për të ndjekur me seriozitet dhe në vijimësi hetimin e kësaj çështje pranë autoriteteve përkatëse”, citon Presidenca.
Në kuadër të këtyre hapave, Presidenti i Republikës do të thërrasë në takim pune Prokurorin e Përgjithshëm dhe Ministrin e Drejtësisë për t’u informuar rreth hapave të ndërmarrë dhe për ndjekjen deri në zbardhjen e të vërtetës me transparencë për këtë ngjarje.
ma.me
