Policia dhe Prokuroria e Vlorës kanë tentuar disa herë të marrin në pyetje Erald Cenajn, i arrestuar si person që ka siguruar mjetin që u përdor në vrasjen e Kristian Markut, i njohur edhe me emrin Kristian Bardhi, shkruan A2 CNN. 36-vjeçari nga Kukësi u prangos pak ditë më parë, por në asnjë moment nuk ka pranuar të japë deklarime, duke mos ndihmuar hetuesit në zbulimin dhe arrestimin e atentatorëve.
Dëshmia e tij konsiderohet kyçe për grupin hetimor, ku i është kërkuar të tregojë se kujt ia dha apo ia shiti makinën e përdorur në krim.
Nga hetimet ka rezultuar se mjeti tip Volkswagen Golf në vendin tonë ka hyrë nga Kosova dhe nuk rezulton i regjistruar në doganë, ndërkohë që kishte qenë në përdorim nga 36-vjeçari Cenaj. Ky i fundit e kishte blerë makinën tek dy shtetas kosovarë, por pa bërë kontratë shit-blerje. Ndaj edhe makina figuronte në emër të shtetasve nga Kosova. Duke ndjekur gjurmët hetuesit kanë shkuar tek pronarët e mjetit, dhe përmes dëshmisë së dy kosovarëve, policia ra në gjurmët e Cenajt, dhe bëri edhe arrestimin e tij për veprën penale të sigurimit të kushteve dhe mjeteve për të kryer vrasje.
Hetuesit dyshojnë se Cenaj nuk ka vepruar i vetëm që makina Volkswagen Golf të futet në territorin shqiptar pa u regjistruar në doganë në Morinë dhe për këtë fakt kanë nisur verifikimet për punonjës të doganës.
Kristian Bardhi u vra me breshëri plumbash më 13 janar teksa udhëtonte i vetëm në drejtim të Vlorës. Si pistë hetimore, agjentët janë përqendruar tek hasmëria mes fiseve Bardhi dhe Reçi në Rrëshen, që prej vitesh ka shkaktuar të paktën 7 viktima deri më tani.
