Pas atentatit me armë zjarri në një lokal në Rrëshen ku humbi jetën ish-drejtori i OSHEE për Veriun, Saimir Jaku, ka folur djali i të plagosurit Gjergj Prenga.
Ai ka treguar se si u futën dy personat e maskuar në mes të lokalit dhe qëlluan, ndërsa ka treguar edhe për lidhjen që kishte me Saimir Jakun.
“Babai im mori 4 plumba, në krahë dhe në këmbë. Por shyqyr Zotit ka shpëtuar.
Unë dua të tregoj se çfarë ka ndodhur dje. Ditën e djeshme në tavolinë kanë qenë Saimiri, babai im dhe nipi i Saimirit, Juri. Në lokal është futur një person me kapuç, jo me maskë siç kanë thënë, dhe ka qëlluar në drejtim të Saimirit.
Pastaj është ngritur babai im duke bërtitur, por personi me kapuç ka qëlluar edhe mbi babain me katër plumba, ndërsa nipi i Saimirit ka ikur. Më pas vrasësi i është kthyer sërish Saimirit, duke e zbrazur të gjithë karikatorin në trupin e tij, dhe është larguar i qetë drejt makinës.
Makina e tyre ishte tip “Benz” me targa false dhe me xhama të zinj. Në Rubik është qëlluar edhe ndaj patrullës së policisë së Rrëshenit që ishte vënë në ndjekje të autorëve”, ka rrefyer ai.
Persona të panjohur ekzekutuan 2 ditë më parë, Saimir Jakun, ndërsa mbeti i plagosur dhe miku i tij Gjergj Prenga. Pak kohë më parë ai u largua nga detyra e drejtorit të OST-së, për t’u vendosur shef dege në OSHEE. Grupi hetimor ka treguar se dy personat mund të jenë vrasës me pagesë e të mirëorganizuar, pasi dy atentatorët, kanë ndjekur të gjitha lëvizjet e Saimir Jakut para se ta ekzekutonin.
Panorama/d.i.
