23-vjecari Mark Antony Samson ka rrëfyer vrasjen e ish të dashurës së tij studentes shqiptare Ilaria Sula në Itali. I pyetur për 5 orë nga hetuesit i riu ka treguar se krimin nuk e kishte paramenduar. Ai tha se e vrau atë mëngjesin e 26 marsit, pasi ajo shkoi një natë më parë në banesën e tij në Via Homs, në lagjen afrikane në Romë.
I dyshuari shpjegoi se 22- vjecarja i kishte shkuar në shtëpi mbrëmjen e datës 25 mars për t’i kthyer disa nga rrobat e tij. Sipas tij ajo kishte qëndruar deri vonë në mbrëmje dhe për të shmangur transportin publik preferoi të flinte aty. Ai tregon se teksa po hanin mëngjesin pa në chatin e saj mesazhe të dikujt tjetër dhe nga xhelozia e ka goditur me thikë tre herë në qafë.
Sipas Samson të dy së fundmi i kishin dhënë fund lidhjes që kishte vazhduar prej disa muajsh me ulje-ngritje.
I dyshuari më pas pretendoi se gjithçka e kishte bërë i vetëm dhe në pyetjet e gjyqtarit hetues për rolin e prindërve ai ushtroi të drejtën për të mos u përgjigjur. Djali tha se e ngarkoi trupin në makinë, pasi e mbylli në një valixhe, duke e braktisur në një luginë. 23-vjeçari pohoi gjithashtu se kishte pastruar vendin e sulmit. Autopsia zbuloi se shkaku i vdekjes së Ilarias ishte humbja e sasisë kritike të gjakut nga plagët e rënda.
Ndërkohë në Romë vijojnë protestat si ndërgjegjësim ndaj vrasjes së studentes shqiptare dhe rasteve të tjera të feminicidit. Një kortezh me mijëra pjesëmarrës kaloi nëpër lagjen San Lorenzo në Romë ku jetonte e reja Ilaria Sula para se të vritej.
