Policia e Shkodrës është vënë e gjitha në lëvizje për zbardhjen e vrasjes së 32 vjeçarit Endri Mustafës. Burimet bëjnë me dije se blutë e Shkodrës kanë ndaluar dy persona të cilët kane dijeni apo janë të përfshirë në ekzekutimin e Mustafës, trupi i pajetë i të cilit u gjet në zonën e Livadheve.
Gjate ditës së djeshme në policinë e Shkodrës janë shoqëruar 8 persona të cilët dyshohet se kishin dijeni për këtë ngjarje, ndërkohë që pas disa orësh hetime, policia ka ndaluar dy prej tyre.
Ende nuk behet i ditur identiteti i të ndaluarve, por mësohet se ndaj tyre janë kryer veprimet procedurale dhe janë ndaluar si të përfshirë në vrasjen e rëndë që tronditi Shkodrën.
Mustafa u gjet i ekzekutuar me 6 plumba në zonën e Livadheve. Ai është një emër i njohur në Shkodër si person me precedentë penalë dhe i lidhur me grupe kriminale të qytetit. I riu, baba i tre fëmijëve, u vra në mënyrë makabre, ku u qëllua me 1 plumb në gojë, 2 në kokë dhe 3 në gjoks. Nga këqyrja e trupit dyshohet se fillimisht ai është dhunuar dhe më pas është qëlluar me armë zjarri.
Mustafa u gjet i vrarë 3 ditë pasi familja e tij e kishte denoncuar zhdukjen. Ai ka qenë i arrestuar më parë dhe i dënuar për plagosje, njihej si pjesë e grupit të Astmer Bilalit në Shkodër.
g.kosovari
