Afërsisht një javë pas atentatit ndaj ish- zyrtarit të Policisë së Shtetit, Ervin Dalipaj dhe mikut të tij Juxhin Dauti, policia e Durrësit, po kërkon një veture “Audi” A5, me ngjyrë të zezë tek derë.
Kjo makinë dyshohet se është përdorur nga një prej dy grupeve të atentatorëve që morën pjesë në vrasjen e të martës së kaluar në Sukth. Burime të policisë thanë se kjo veture është fiksuar nga një kamera sigurie në rrugën dytësorë të zonës, ndërsa lëvizte e shoqëruar nga një autoveturë “BMW” X5 me ngjyrë të zezë raportn Klan. Nga krahasimi i të dhënave të policisë si dhe nga dëshmitë e personave te ndryshëm, rezulton se mjetet janë të ngjashme me ato të përdorura në atentat. Pavarësisht identifikimit të mjetit, nga këqyrja e këtyre pamjeve të fiksuara, policia dhe ekspertet nuk kanë arritur të identifikojnë targën e asnjë prej këtyre makinave.
Policia është duke ekzaminuar edhe pamje nga një seri kamerash sigurie të tjera në disa biznese të zonës. Pistat e hetimit, mbeten ato të hakmarrjes ndaj Dautit, apo ajo që lidhet me vrasjen e Gazmend Çollakut, në dhjetor të vitit 2015./a.m.
