Ngjarja që tronditi Laçin mbrëmjen e së dielës duket se është zbardhur nga autoritetet ligjzbatuese.
Burime nga Policia e Shtetit bëjnë të ditur se janë identifikuar dhe janë shpallur në kërkim dy autorët e dyshuar.
Bëhet fjalë për shtetasit Markel Gjonbushi 25 vjeç dhe Vinçens Pali (Bushi), për kapjen e të cilëve blutë kanë ngritur disa postoblloqe që prej të dielës.
Një natë më parë, dy të rinjtë Mikel Jushi dhe Jani Jushi mbetën të vrarë pas një sherri për motive të dobëta në një lokal të Laçit.
***
Dinamika e ngjarjes
Ngjarja ndodhi rreth orës 20:15 në lagjen nr. 1 në qytetin e Laçit, afër një lokali ku ndodheshin viktimat dhe autorët. Mësohet se dy viktimat ndodheshin në një tavolinë dhe kanë debatuar me autorët.
Dy palët më pas kanë dalë jashtë lokalit për t’u sqaruar, sherri ka agravuar dhe duke parë që autorët kishin armë me vete, dy kushërinjtë janë larguar me vrap. Por, autorët i kanë ndjekur për rreth 100 metra Mikel dhe Jani Jushin dhe i kanë qëlluar disa herë me pistoletë.
Mikel Jushi dhe Jani Jushi u dërguan në gjendje të rëndë për jetën në një spital privat në Tiranë për ndihmë të specializuar por kanë ndërruar jetë si pasojë e plagëve që morën.
/a.r
