Gramos dhe Lavdimir Kurti, xhajë e nip, u ekzekutuan me automatik për motive të dobëta në fshatin Kurjan nga Altin Kuka.
Autori qëlloi në drejtim të tyre në ambientet e një lokali në pronësi të viktimave. Burime konfidenciale nga policia bëjnë me dije se autori i ngjarjes nuk ka qenë i vetëm në momentin kur ka kryer krimin dhe policia ka arrestuar edhe një person tjetër dy orë pas ngjarjes.
Raportohet se shkaku që ka shtyrë 49-vjeçarin të marrë armën automatike dhe të qëllojë mbi ta është bërë një grindje mes fëmijëve të tyre, që është regjistruar mbrëmjen e djeshme.
Sakaq në momentin që ka ndodhur ngjarja dy viktimat kanë qenë në lokalin në qendër të fshatit, që e kanë pronë të tyre.
Sipas Drejtorit të policisë së Fierit, Shpëtim Hasanaliaj, i cili doli në një deklaratë për mediat duke dhënë sqarime për rastin, 49-vjeçari është vetëdorëzuar pak pasi kreu vrasjen.
“Rreth orës 14:00 në fshatin Kurjan ka ndodhur një ngjarje e rëndë kriminale, ku shtetasi Altin Kuka, banues në Fier dyshohet si autori i ngjarjes së ndodhur, duke vrarë me armë zjarri automatik dy shtetas, xhaxha dhe nip, të cilët kanë ndërruar jetë menjëherë në vendngjarje. Pas kryerjes së këtij akti kriminal shtetasi Altin Kuka është vetëdorëzuar në polici së bashku me armën e krimit. Dyshohet se ka ndodhur për motive të dobëta, për shkak të një grindje që ka ndodhur mes djalit të tij dhe dy viktimave”, tha Hasanaliaj.
/a.r
