Gjykata e Apelit te Krimet e Rënda ka lënë në fuqi vendimin për shtetasin Denis Shtraza, i dënuar me burgim të përjetshëm.
Denis Shtraza akuzohet për vrasjen e Gazmend Çollakut më 6 janar 2016. Gazmend Çollaku u rrëmbye në mes të qytetit të Durrësit dhe një ditë më pas u gjet i lidhur dhe i vrarë me plumb në kokë në anë të rrugës, në Murqinë të Krujës.
Hetuesit dyshojnë se vrasja e Çollakut ka lidhje me motive hakmarrjeje për shkak të një atentati të mëparshëm të organizuar ndaj Denis Shtrazës, ndërkohë që janë radhitur edhe ngjarje të tjera të ndodhura në Durrës.
Sipas prokurorisë, Çollaku u rrëmbye më datë 6 janar nga katër persona të maskuar si oficerë policie dhe një ditë më pas trupi i tij u gjet i lidhur këmbë e duar dhe me plumb në kokë në fshatin Murqin të Krujës.
Sipas prokurorisë, akt-ekspertimet laboratorike tregojnë se disa njolla gjaku të gjetura në automjetin e ish-oficerit të policisë Ervin Dalipaj janë të njëjta me gjurmët e gjakut të konstatuara në fashetat me të cilat ishte lidhur viktima.
I akuzuar për ngjarjen ka qenë edhe ish-polici Ervin Dalipaj i cili u ekzekutua në një atentat në Durrës në vitin 2017.
Shtraza u arrestua në janar 2016, teksa po largohej nga Shqipëria duke përdorur Aeroportin e Rinasit. I njohur si person me tendenca të theksuara kriminale, me precedentë penalë të mëparshëm në fushën e veprave penale kundër jetës, ai dyshohet të jetë dhe anëtar i një grupi kriminal që operon në zonën e Durrësit dhe të Tiranës.
Në vitin 2009, Shtraza u ekstradua nga Gjermania si autor i dyshuar i dy plagosjeve të rënda, nga gjykimi i të cilave u shpall fajtor, por doli me dënime të lehta që konsistonin në gjobë dhe 4 muaj burg.
Viktima ishte qëlluar me armë në kokë dhe fillimisht mendohet se ekzekutimi i tij ka lidhje me vrasjen e dy të rinjve, Ervin Kodra dhe Endri Caushaj, ngjarje e ndodhur në muajin dhjetor, pranë hyrjes së Portit të Durrësit.
Çollaku u mor peng nga persona të veshur me uniforma policie dhe dëshmitarët në vendngjarje menduan se bëhej fjalë për një shoqërim të tij.
a.ç
