Gjykata e Sarandës ka caktuar masën e sigurisë “arrest me burg“, për 31-vjeçarin e dyshuar si të përfshirë, në ngjarjen ku mbeti i vrarë biznesmeni Rexhep Ismaili, ngjarje e ndodhur mbrëmjen e së enjtes, 7 maj, në qytetin bregdetar.
31-vjeçar me inicialet K.V, banues në Shën Vasil të Himarës, ndodhet në spitalin e Sarandës, pasi nga ngjarja ka marrë një plagë me armë zjarri në këmbë. Ndërkohë 50-vjeçari T.R është lënë në masën e sigurisë “arrest në shtëpi”.
31-vjeçari dyshohet të jetë personi që kishte konflikt me 50-vjecarin T.R dhe për këtë mendohet se ka thirrur disa miq të tij pasi e kishte pikasur T.R-në në lokalin e 66-vjeçarit Rexhep Ismaili.
Pikërisht aty ka shpërthyer konflikti fizik ne sende të forta që ka degjeneruar më pas në shkëmbim zjarri mes palëve. Mendohet se i riu është plagosur nga të shtënat me Kallashnikov nga Rexhep Ismaili, çka detyroi më pas një prej të rinjve të hapte zjarr me pistoletë duke e vrarë atë.
Shtetasi K.V rezulton person me precedentë penalë për “drejtimi i automjeteve në mënyrë të parregullt”, ndërkohë që në gusht 2023 ishte shpallur në kërkim për “prodhim dhe shitje të lëndëve narkotike” dhe “kultivim i bimëve narkotike” por nuk dihet nëse ka kryer dënim për këto vepra.
Rexhep Ismaili, që i doli në mbrojtje V.R. në këtë konflikt, ishte pronar i disa bizneseve në Sarandë si dhe mbante postin e kryetarit të shoqatës “Çamëria” të degës Sarandë.
