Në vijim të dëshmisë së tij për vrasjet e Julian Sinanajt, Ndriçim Gjokona ka rrëfyer edhe ato që di për vrasjen e biznesmenit Agron Çela. Ai thotë se Sinanaj e mohoi që ta kishte vrarë ai Çelën, por nga veprimet e dyshimta, Gjokona thotë se dyshon që e kishte vrarë pikërisht ai. Gjokona tregon edhe faktin se pak para shpërthimit në apartamentin e Ardian Kollozit, Julian Sinanaj kishte marrë një shtëpi me qera pranë ishdeputetit demokrat, transmeton Tema.
“Lidhur me këtë vrasje të Agron Çelës unë e kam marrë vesh nga lajmet në TV. Në këtë periudhë me Julianin kemi ndenjur ditë për ditë bashkë, përditë. Të nesërmen e vrasjes së Agron Çelës jam takuar me Julianin te këndi i lojërave, përballë me shkollën industriale dhe buzëqesha për ta përshëndetur. Më ka thënë tekstualisht fjalët “mos më buzëqesh se nuk jam unë”.
Pas kësaj, kur unë i thashë: “Nuk kam arsye pse të dyshoj”, më tha fjalët: “Ata”, duke sharë, për pjesën e Erion Gënis dhe pjesa tjetër. “Ata mos mendojnë se jam unë”. Disa minuta më vonë, ndoshta 30 minuta pasi pimë kafenë, më ka kërkuar ta çoja te vendi ku kishte ndodhur vrasja. Unë isha vlonjat dhe i dija vendet. I thashë: “Dakord, po të çoj”. Nuk i tregova vendin ku ishte bërë vrasja, por diku tjetër. Unë i tregoja këtë vend, ai shikonte vendin ku ishte bërë vrasja. Madje dyshoja se mund ta kishte bërë ai vetë vrasjen.
Kur vajtëm te vendi, shikonte andej nga zona ku ishte bërë vrasja. Bënte një buzëqeshje që nuk ishte as buzëqeshje, as ngërdheshje, ironi. Pas vrasjes, derisa u largua nga Vlora, bënim përditë atë rrugë. Sqaroj diçka për punën e Kollozit. Kam vënë re që Juliani disa ditë para shpërthimit kishte ndryshuar banesë dhe kishte marrë banesën në afërsi të pallatit të Kollozit”, thuhet në dëshminë e Gjokonës, zbardhur nga Panorama.
