Në pak ditë, dy emigrantë shqiptarë u gjetën të vdekur në burgun famëkeq të Koridalos në Athinë, që zyrtarisht klasifikohet si burg i sigurisë së lartë.
Bandiol Tushaj u gjet i vdekur këtë fundjavë në qelinë e tij në Koridalos, rreth dy javë pasi në të njëjtin burg u ekzekutua me thikë, Albert Bako. Ky i fundit sapo ishte transferuar nga një burg tjetër pasi do të dëshmonte për vrasjen e avokatit grek, Mihaliz Zafiropoulos.
Nga mediat greke është mësuar se të dy shqiptarët kanë qenë të akuzuar si pjesëtarë në ekzekutimin e avokatit të njohur grek, Mihalis Zafiroplulos. Bako ka qenë i akuzuar si një nga dy ekzekutorët, ndërsa Bardhyl Tusha, si personi që strehoi Bakon dhe Ibrahim Ibrahimaj, si ekzekutorin e avokatit.
Dyshimet hetimore janë se Tusha i ka strehuar në banesën e tij në Kalithea.
Në momentin e arrestimit të Tushajt, policia i gjeti në banesë kallashnikovë, pistoleta, dinamit dhe qindra fishekë. Ai konsiderohej si një ndër kokat e krimit të organizuar të mafies shqiptare në Athinë.
Tushaj akuzohet se ka qenë prezent në një vrasje të ndodhur në Glifadha, ku dy shtetas shqiptare ekzekutuan pronarin shqiptar të një lokali në këtë zonë, por edhe gjatë një plagosje me armë në sheshin “Davaki” në Kalithea, ku sërish viktima ishte shtetas shqiptar. Policia greke thotë se ai është pjesëmarrës në disa vrasje te tjera, por sajë aftësive të tij për t’u maskuar i kishte shpëtuar disa herë prangave.
Në tetor të vitit 2017, policia greke e arrestoi së bashku me Albert Bakon dhe Klodian Lekocajn.
Ndonëse nuk u akuzua si ekzekutor i Zafiropoulos, Tushaj u mbajt nën arrest pasi u akuzua për ndihmesë ndaj personave në kërkim dhe fshehje krimi, si dhe për armëmbajtje pa leje.
Policia greke tha se vdekja e Tushës ndodhi nga mbidoza, por nga familja është thënë se e kanë helmuar në burg, nën dyshimet se kjo është bërë nga gardianët ose persona të tjerë brenda burgut.
Për më tepër, familja e të ndjerit ka rrëzuar deklaratën e policisë se Tushaj ishte nën arrest për trafik droge, duke thënë se ishte nën hetim për armëmbajtje pa leje.
Persona që njohin mirë botën e krimit në Greqi, thonë se Tushaj mund të jetë eliminuar fizikisht nga banda e ciganëve në burgun Koridhalos, sikundër edhe Bako.
Për më tepër, edhe Lekocaj, më herët ka denoncuar tentativë helmimi brenda në burg. Madje për Lekocajn janë marrë masë shtese sigurie në burgun Koridhalos.
Në të gjitha rastet, gishti tregohet kundër personit që ka pranuar se ka qenë ai që tërhoqi këmbëzën në ekzekutimin e Zafiropulos, dhe kreu me dorën e tij, vrasjen e Albert Bakos në oborrin e Koridhalos, Ibrahim Ibrahimaj.
Por a është kreu i bandës së ciganëve në Koridhalos, Ibrahim Ibrahimaj, urdhëruesi i vdekjeve të pjesëtareve të bandës së Bakos në burg, apo ai është përdorur prej organizatës kriminale të Aristidis Floros, një biznesmeni grek, kreu i një organizate kriminale, që grabiti nëpërmjet një skeme mashtrimi 260 milionë euro nga shteti grek, e në vazhdim, urdhëroi Bakon dhe njerëzit e tij, të heqin qafe avokatët e shtetit të cilët e kishin zbardhur këtë skeme dhe e çuan në burg.
Askush nuk mund ta thotë me siguri këtë, por ajo çka dihet, është fakti që viktima të kësaj lufte shume milionëshe, janë kriminelë shqiptarë të nivelit të ulët, të cilët përdoren për të larë hesapet mes aferave milionëshe të organizatave kriminale greke.
/a.rada
