Krimi i trefishtë dje në Shijak tronditi të gjithë opinionin publik ku burri vrau me armë zjarri gruan dhe vjehrrin dhe pas 7 orësh i hipur mbi shtyllë vrau edhe veten e tij.
Nazire Petova, nëna e autorit të krimit Dritan Petova, ka treguar mes lotësh përpara grupit hetimor takimin e saj e të birin pas vrasjes së kryer. Ai kishte shkuar në shtëpinë e tij, ndoshta dhe për të dhënë përshëndetjen e fundit, pasi pak orë më vonë u vetëvra. Nazirja pohoi më tej se nuk mund ta merrte kurrë me mend se i biri do të përfundonte duke vrarë gruan dhe vjehrrin e tij.
“Dritani erdhi në mëngjes herët në shtëpi e qëndroi vetëm dy minuta. Mori një bidon ujë, gjuha i rrinte e tharë, dhe iku me vrap. Ishte i zbehtë si limoni, me armën e gjahut në krah. Nxitonte, nuk tha çfarë kishte bërë. Mendova se kishte etje e po ikte prapë në punë” tregon ajo.
Nga ana tjetër, Nazire Petova tha se Dritani ishte në prag divorci me bashkëshorten e tij, 35-¬vjeçaren Zaje Petova, pasi kishin konflikte të vazhdueshme.
“Djali nuk e pranonte që të ndahej nga gruaja. Kishte raste kur bënin sherre, pasi djali pinte”, pohoi nëna e autorit.
Nëna e 41-¬vjeçarit, edhe pse jo në gjendje të mirë shëndetësore, e sapodalë nga spitali pas një operacioni në zemër, ka bërë të gjitha përpjekjet e saj që i biri të hiqte dorë nga kërcënimet e tij se do të vriste vetën në shtyllën ku kishte hipur. Mes lutjesh dhe lotësh, duke i thënë se e ‘kishte falur për krimet’, i kërkoi djalit që t’i dorëzohej policisë.
