KOSOVË – Tre persona janë arrestuar nga policia e Kosovës lidhur me vrasjen e trefishtë në Gllogjan, ku humbën jetën dy nxënës dhe shoferi i një autobusi.
Mediat kosovare shkruajnë se tre të arrestuarit dyshohet se kanë lidhje me vrasjen e shoferit Gani Gjokaj dhe dy nxënësve, Genta Mustafaj dhe Ledion Hamzaj në Gllogjan.
Sipas Gazetës Ekspress, motivet e këtij sulmi lidhen me një rast të vetëvrasjes të një vajze nga Gllogjani. Sipas familjes së vajzës së vetëvrarë, arsyeja e kësaj vetëvrasje është shoferi i autobusit, Gani Gjokaj.
Siç duket, vrasja e 2 nxënësve ka qenë “aksidentale”, ndërsa ekzekutimi i shoferit i planifikuar.
Vrasja e trefishtë në Gllogjan ndodhi mbrëmjen e 26 nëntorit, pas një sulmi me kallashnikov që u bë drejtim të autobusit i cili ishte në lëvizje. Krimi tronditi shqiptarët kudo në botë./ Gazeta SHQIP
