Shtetasi italian Salvatore Leticia 35 vjeç, pjesë e grupit kriminal Camorra, dhe një nga të arrestuarit për vrasjen e trefishtë në Tiranë, ka dalë sot para trupit gjykues i veshur me fanellën e Napolit. Ndoshta zgjedhja e italianit ishte e rastësishme për të treguar vendlindjen e tij ose edhe për të dëshmuar lidhjet e tij kriminale në Napoli.
I prangosur së bashku me dy vëllezërit, Klevis dhe Markelian Doçi, pasi gjatë shkëmbimit të zjarrit të dyja palët rivale lanë të vrarë tre persona, italiani u la së bashku me ta nën masën “arrest me burg” deri në përfundim të hetimeve.
Por 35 vjeçari kur u pyet nga Gjyqtari i Krimeve të Rënda për të shkuarën e tij, ai pohoi se ka qenë i dënuar më herët për çështje droge dhe vjedhje. Megjithatë pyetjes se çfarë profesioni ka ai iu përgjigj murator.
“Çfarë profesioni keni?” kërkoi të dijë gjyqtari. “Jam murator” u përgjigj Leticia.
Nga ana e tij prokurori i dosjes deklaroi se vrasja e trefishtë e ndodhur në bulevardin “Zogu i Parë”, ka ndodhur për shkak të gjakmarrjes. Sipas prokurorit gjithçka ka nisur në dhjetor të 2014-ës, kur është tentuar të vritet Mentor Lufi. Në prill, në Holandë, si kundërpërgjigjie për atentatin e dështuar, dy nipat e Lufit, Klevis dhe Markelian Doçi kanë marrë pjesë në vrasjen e Durim Sulkut.
