Fqinji i Ruzhdi Arishtës në një intervistë për “Gazeta Shqiptare”, tregon se para disa muajsh Ruzhdiu kërcënoi me jetë disa punonjës të OSHEE-së, që i shkuan për kontroll në banesë për energjinë elektrike.
Ai tregon se 56-vjeçari ishte njeri me rrezikshmëri të lartë dhe se nuk duhet ta nxirrnin nga spitali Psikiatrik.
Ndërsa fqinjit i mbyti lopën dhe ia theri me thikë, vetëm se iu fut në oborrin e tij.
“Po dilja në atë moment nga shtëpia kur dëgjova një debat të fortë. Në fakt u afrova për disa metra dhe pash Ruzhdiun që po përleshej fizikisht me Besar Sherbelen.
Për një çast mendova se situata mes tyre ishte qetësuar, por Ruzhdiu shkoi në banesën e tij dhe mori një armë e qëlloi 2 herë në drejtim të Besarit.
Djali ra përtokë dhe kërkonte ndihmë, pasi plumbi i kapi mushkërinë.
I tmerruar dola në rrugë dhe i ngrita dorën një mjeti me targa të huaja. Pasi makina ndaloi, e çoi me urgjencë 21-vjeçarin në spital. Më pas unë lajmërova prindërit e tij” shprehet ai.
Ndërsa përsa i përket jetës së autorit të vrasjes së efektivit të RENEA-s, ai shprehet se “Ruzhdiu ka qenë disa herë në spitalin Psikiatrik të Shkodrës dhe ka qëndruar me periudha aty.
Kur gjendja e tij u stabilizua, mjekët e nxorën nga spitali dhe ai erdhi të jetonte i vetëm në banesën e tij.
Shtëpinë ia kishin dhuruar vëllezërit. Kohët e fundit në banesë kemi parë edhe një grua të moshës 40-vjeçare.
Kur e pyetëm se kush ishte, na the se kishte marrë një shërbyese. Por gruaja nuk qëndroi më shumë se një muaj, sepse ai e kërcënoi se do ta vriste. Kishte halucinacione, çrregullime mendore”përfundoi ai.
