Pak minuta para nisjes së orarit zyrtar të votimit, zëvendës kryeministri Erion Braçe ka shkuar për të dhënë votën e tij.
Deri tani nuk ka pasur ndonjë incident nga militantë të opozitës, dhe procesi po shkon normalisht.
“Votoni, asgjë tjetër. Mua më duhet të ndjek edhe dy zona të tjera në Fier e Divjakë, por edhe pse është freskët. Më mirë të votohet tani në mëngjes. Zgjidhni orët e mëngjesit e më pas shihni punët tuaja”,- tha ai.
Po ashtu për standardin e zgjedhjeve, ai i bëri thirrje komisionerëve në gjithë vendin të zbatojnë ligjin.
“Zgjedhje ka, zgjedhjet po bëhen në datën dhe në orën e caktuar. Zgjedhjet i delegjitimon vetëm mungesa e standardeve, ndaj i bëj thirrje të zbatojnë ligjin, vetëm ligjin. Të ndalojnë vendimin familjar”, deklaroi Braçe.
Më pas mësohet se i dyti që do t’i drejtohet kutisë së votimit do të jetë, kryebashkiaku aktual i Tiranës, i cili kandidon për një mandat të dytë, Erion Veliaj. Ky i fundit do të votojë tek Parku Olimpik në Tiranë, aty ku është edhe zona e tij e banimit.
Ndërkohë, kryeministri Edi Rama pritet të votojë në orën 09:00, në Surrel.
Nga ana tjetër e qetë paraqitet situata edhe në selinë blu. Pritet që pas pak minutash të mbërrijë në zyrën e tij, kryedemokrati Lulzim Basha.
Kujtojmë se në një mesazh të shpërndarë orët e vona, Basha u kërkoi qytetarëve të ruanin qetësinë, pasi sipas tij Rama është i interesuar për dhunë.
Theksojmë se pjesëmarrja do të jetë faktori kyç në këto zgjedhje pa opozitën./l.m
