Komisioni Rregullator miratoi sot disa ndryshime në listën e dokumentacionit që kërkohet për të vërtetuar qëndrimin e zgjedhësit shqiptar që voton jashtë territorit të Shqipërisë, me qëllim regjistrimin në listën e zgjedhësve jashtë vendit.
Komisioni Rregullator vlerëson se procesi i regjistrimit të votuesve nga jashtë për zgjedhjet për Kuvend të datës 11 maj 2025 ka vijuar me intensitet të lartë.
Ndaj, për të adresuar sfidat aktuale dhe me synimin përmirësimin dhe lehtësimin e procesit të regjistrimit të votuesve nga jashtë vendit, lindi nevoja të bëhen disa ndryshime.
Ndryshimet të cilat u miratuan me 5 vota pro, krijojnë lehtësi në regjistrimin e zgjedhësve të cilët nuk zotërojnë një dokument provues adrese në emrin e tyre.
Në këtë rast, ata kanë mundësi të përdorin si provë adrese në PER, dokumentin provues në emër të një familjari të tyre ose të dikujt tjetër pa lidhje familjare mes tyre.
Komisioni Rregullator shqyrtoi edhe projektvendimin “Për rregullat e sjelljes së institucioneve publike në zgjedhje dhe ndalimin e keqpërdorimit të aseteve publike”, i cili nuk u miratua.
