Në një takim të zhvilluar mbrëmjen e sotme me të deleguarit e qarkut të Tiranës, që u zhvillua në një nga hotelet e kryeqytetit, kryeministri Edi Rama ka dhënë porositë e tij për votën e diasporës.
Shefi i qeverisë ka kërkuar që të vijojë puna për të arritur objektivin e PS për regjistrimin e emigrantëve, që përsa i përket kryeqytetit, socialistët synojnë të regjistrojnë 35 mijë persona.
Po ashtu nga të pranishmit, A2 CNN mëson se në këtë takim, marrëdhënia Rama-Veliaj ka qenë e çtensionuar dhe në harmoni politike.
Po ashtu bëhet me dije se kryeministri i ka kërkuar Ogerta Manastirliut dhe Erion Veliajt që të punojnë së bashku për të arritur objektivat e PS në zgjedhjet e 11 majit.
Kryeministri dhe Kryebashkiaku i Tiranës u shfaqën së bashku gjatë ditës së sotme edhe në Qytetin Studenti, ku inspektuan punimet për rikonstruksionin e disa prej konvikteve.
Më herët gjatë paradites Rama për dy orë mbajti të mbyllur në selinë rozë drejtuesit politik për votën e diasporës. Secili prej tyre raportoi të dhënat e regjistrimit për bashkitë e qarqeve që kanë në ngarkim.
Duke qenë se numri i aplikantëve në faqen e KQZ është ende larg objektivit të librit të kontakteve të PS, Rama i ka kërkuar të vetëve që të punojnë më shumë për të rritur numrin e emigrantëve të regjistruar, sidomos në ato qarqe ku shifrat janë të ulëta.
Pavarësisht se në këtë mbledhje nuk është diskutuar, A2CNN ka mësuar se drejtuesit politik e kanë vënë në dijeni kryetarin e tyre për listat e kandidatëve pavarësisht se deri në ditën e fundit të përcaktuar në kod, ekipi socialist mund të pësojë ndryshime.
