Vota e diasporës, PS draftin gati, PD e pengon me kushte: Të zgjatet afati i letërnjoftimeve

Diaspora me 11 maji nuk do ta ketë të nevojshme të vijë në Shqipëri për të votuar, pasi me ndryshimet në ligj ata mund ta ushtrojnë këtë vullnet nga vendi ku jetojnë. Pavarësisht se edhe në këtë rast duket nuk janë mbyllur të gjitha shtigjet që mund ta dëmtojnë procesin, pasi KQZ disa javë më parë ka ngritur një shqetësim që lidhe me kohën që i nevojitet postës në për ta çuar dhe për ta kthyer zarfin, transmeton A2 CNN.

Letrës informuese të KQZ-së, PS i është përgjigjur pa hezituar duke bërë gati ndryshimet në KOD, të cilat Sekretari i Përgjithshëm i selisë rozë në një intervistë për A2CNN thotë që mazhoranca do t’i depozitojë në fillim të sesionit parlamentar në janar duke treguar edhe detaje.

Demokratët janë më skeptikë ndaj KQZ, pasi sipas nënkryetarit të PD-së, Oerd Bylykbashi i shprehur në A2CNN, ky institucion në këto momente i ka të gjitha mundësitë ta bëjë të mundur votën e emigrantëve pa ndryshime në ligjin elektoral.

Po nga ana tjetër, Bylykbashi nuk e mbyll derën e një konsensusi politik për ndryshime, ama duke ja bërë të qartë socialistëve që edhe PD ka propozimet e saja, që lidhen me shtyrjen e afateve të vlefshmërisë të dokumenteve të identifikimit, raporton A2 CNN.

Një tjetër ndryshim nga propozim fillestar që pritet të implementohet, ka të bëjë me faturën. Emigrantët shqiptarë nuk do të paguajnë kostot e postës në kthim.

Të gjithë shqiptarët të cilët do të duan të zgjedhin deputetët që duan të shohin në Parlament, me 11 janar mund të nisin të regjistrohen në platformën elektronike të KQZ duke krijuar llogari dhe më pas duke dërguar kërkesën që në banesën e tij t’i vijë zarfi me listën e kandidatëve.