Prokuroria e Durrësit ka nisur hetimet për 3 gjyqtarë, të cilët dyshohet se kanë konsumuar elementët e veprës penale të “shpërdorimit të detyrës”, në rastin e shqyrtimit gjyqësor civil për pronësinë e ish-hotel Vollga.
Një nga gjyqtarët e kësaj çështje, Vladimir Skënderi duke folur për “News 24” ka shpjeguar vendimin e Gjykatës dhe faktet ku janë bazuar.
“Dua të garantoj publikun dhe njerëzit që më njohin se bëhet fjalë për një vendim të drejtë të bazuar në ligj dhe prova. Kemi qenë 3 gjyqtarë dhe kemi korrigjuar një problem të zyrës së regjistrimit të pasurve të paluajtshme. Që kishin çregjistruar pronën e kompanisë Arabian Saudi pa qenë e pranishme. Por askujt nuk mund t’i hiqet prona pa një proces të rregullt gjyqësor. Kemi kërkuar të ndreqet ai gabim. Ky vendim është i formës së prerë, i nënshkruar nga të tre gjyqtarët. Dhe nuk mund të kontestohet. Deri më tani unë dhe kolegët e mia nuk jemi thirrur as nga Gjykata as një prokurori. Jam njoftuar nga familjarët për këtë gjë, të cilët e kishin dëgjuar në televizor”, tha Skënderi.
Gjyqtarit tha se gjyqi për pronësinë e ish-hotel Vollga zgjati një vit në gjykatën e Durrësit, dhe më pas mori formë të prerë, dhe sipas tij nuk ka lidhje me Emiljano Shullazin të cilit dhurimi i është bërë një vit më vonë.
“Emri i Emiljano shullazit në këtë rast flitet pa të drejtë, pasi ku vendim është bërë më 2013, ndërsa i është dhuruar Shullazit në 2014 me sa kam parë në media. Nuk kam ide për morinë e gjyqeve që janë zhvilluar mes palëve. Nga sa kam konstatuar nga provat që kam në dosje kjo pronë është bërë nga “Arabian Saudi” 800 mijë dollarë para vitit 1996. Dhe më pas nga Zyra e Regjistrimit të Pasurive të paluajtshme i kaloi pronësia dikujt tjetër, dhe ne kërkuam të rregullohej ky gabim”, shpjegoi gjyqtari Skënderi.
Duke shpjeguar vendimin e marrë, gjyqtari tha se “Kjo pronë i është dhënë nga ZVRPP shtetasit Zamir Hasa. Mënyra sesi iu hoq pronësia “Arabian Saudi” dhe iu dha Zamir Hasës për mua është e paligjshme. Dhe ne e vunë në vend këtë gjë, duke bërë drejtësi. Kur “Arabian Saudi” është vënë në dijeni se i është hequr pronësia i është drejtuar gjykatës”.
