Pasi e mundi në transfertë 4 ditë më parë Kombëtarja e femrave në volejboll ka bërë të njëjtën gjë edhe sot në Shqipëri ndaj Izraelit, duke fituar 3-1 me sete në ndeshjen e katërt të Grupit B. Sukses ky që i bën vajzat kuqezi të kualifikohen në fazën finale të këtij eventi, “European League”.
Një triumf i merituar edhe pse disi më i vështirë se ai i pak ditëve më parë, por këtë herë vajzat kuqezi të trajnerit Altin Martiri nuk përsëritën gabimet e sfidës me Austrinë. Me 3 fitore dhe një humbje deri më tani në Grupin B, Shqipëria siguron kualifikimin për më tej edhe pse ka ende edhe dy takimet për të zhvilluar (në Austri jashtë fushe dhe me Gjeorgjinë në Tiranë). Kjo është hera e parë që Shqipëria kualifikohet në fazën finale të këtij eventi në edicionin e tretë radhazi që merr pjesë.
Shqipëri – Izrael, 3-1 (25-23, 25-19, 27-29, 25-16)
SHQIPËRIA: Bici, E.Tuci, Xheka, Marina, Prenga, Thaka, Picaku, Sejfullai, Rexhepi, Kushi, Sijoni, M.Tuci, Shehi, Dodani. Trajner: Altin Martiri
IZRAELI: Dudockin, Kopilovitch, Stein, Jaloba, Goffer, Lander, Malik, Zilberman, Matviyenko, Marmen, Lahav, Ganah. Trajner: Giuseppe Cuccarini
Gjyqtarë: Andrei Taran (Rumani), Arjan Shehu (Shqipëri)/BW/a.m.
