Dy persona kanë rënë në prangat e policisë së Durrësit me akuzën e vjedhjes. E para është një 22-vjeçare e cila ka vjedhur një shumë parash në një lokal në lagjen nr. 1 të qytetit bregdetar.
“Specialistët për Hetimin e Krimeve të Komisariatit të Policisë Durrës arrestuan shtetasen B. Q., 22 vjeçe, banuese në Durrës, pasi ka vjedhur një shumë parash në lokal në lagjen nr. 1, Durrës”, njofton Policia.
Ndërsa një 35-vjeçar nga Kavaja është arrestuar pasi u kap në flagrancë duke vjedhur një banesë. Ai dyshohet se ka vjedhur edhe në një banesë tjetër.
“Specialistët për Hetimin e Krimeve të Komisariatit të Policisë Kavajë arrestuan shtetasin D. B., 35 vjeç, banues në Kavajë, pasi është kapur në flagrancë duke vjedhur në banesën e shtetases M. B. Gjithashtu, nga veprimet hetimore dyshohet se ky shtetas ka vjedhur edhe në një banesë tjetër”, njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
