Policia e Elbasanit ka arrestuar një 40-vjeçar, i identifikuar si A. Ç., i njohur dhe me emrin tjetër A. B., banues në Elbasan, i cili dyshohet se është autor i disa vjedhjeve të ndodhura në qytet gjatë ditëve të fundit.
Sipas të dhënave zyrtare, më datë 11 qershor 2025, i dyshuari ka vjedhur shuma parash nga çantat e tre punonjëseve të spitalit rajonal të Elbasanit. Ndërsa një natë më vonë, më 12 qershor, ai ka hyrë me thyerje në një dyqan elektronik në lagjen “Sul Paprri”, ku ka marrë disa pajisje elektronike.
Pas denoncimeve të bëra nga katër qytetarë dhe në kuadër të operacionit policor të koduar “Skeda”, shërbimet e Komisariatit të Policisë Elbasan kanë ndërhyrë me shpejtësi, duke identifikuar dhe lokalizuar autorin e dyshuar. Pajisjet e vjedhura u gjetën dhe u sekuestruan në një banesë të braktisur, në të njëjtën lagje ku ndodhi vjedhja e dytë.
Rezulton se 40-vjeçari është një person me precedentë të mëparshëm penal për të njëjtën vepër penale.
