Policia e Vlorës ka arritur të zbulojë dhe sekuestrojë brenda një stani në fshatin Kropisht të qytetit bregdetar 119 kg lëndë narkotike kanabis sativa si dhe arsenal armësh, ndërsa janë arrestuar edhe 3 persona. Në kuadër të operacionit të koduar “Kropishti”, pas një hetimi 1 mujor policia ka zbuluar në brendësi të stanit në fshatin Kropisht 119 kg e lëndës narkotike dhe arsenalin e armëve. Po ashtu janë zbuluar dhe asgjësuar 4815 rrënjë narkotike të llojit kanabis sativa.
Në prangat e policisë kanë rënë edhe poseduesit e drogës Xhevdet Koçiraj, 73 vjeç, banues në fshatin Kropisht, Përparim Koçiraj, 48 vjeç, banues në lagjen “Pavarësia”, si dhe Julian (Sokol) Koçiraj, 35 vjeç, banues në lagjen “10 Korriku”.
Po ashtu janë shpallur në kërkim edhe 2 bashkëpunëtorët Dritan Koçiraj, 38 vjeç, banues në lagjen “10 Korriku”, dhe Enea Zenelaj, 23 vjeç, banues në lagjen “Pavarësia”.
Sipas policisë, droga u gjet e fshehur në stanin në pronësi të të arrestuarve. Po ashtu në stan u zbuluan dhe u sekuestruan edhe:
– 2 armë zjarri Automatikë model 56′
– 1 armë gjahu Teke,
– 101 fishekë të kalibrit 7.62
– 3 automjete, të gjetura në vendin e ngjarjes.
Në afërsi të stanit të tyre, Policia ka asgjësuar gjithashtu edhe 4-Parcela me 4815 rrënjë bimë narkotike me lartësi 50-120 cm.
Sakaq, uniformat blu po punojnë edhe për kapjen dhe arrestimin e personave të shpallur në kërkim.
