Shpëtim Gjika fiton një tjetër betejë me drejtësinë shqiptare. Ish-kryetari i Bashkisë së Vlorës është shpallur i pafajshëm nga gjykata e këtij qyteti, për akuzën e shpërdorimit të detyrës. Brenda një seance gjykatësja Mirela Mishgjoni dëgjoi pretencën e prokurorisë, konkluzionet e avokatit dhe më pas shpalli të pafajshëm Gjikën. Prokuroria e Vlorës pati kërkuar tre vite burg për ish-kryetarin e bashkisë, pasi e akuzonte për një shkelje të vitit 2008. Sipas hetimit, Gjika i ka shitur një subjekti privat një truall rreth 350 metër katror tokë në vitin 2008 pranë Gjimnazit “Ali Demi” në Vlorë. Ky veprim nuk duhej bërë me firmën e Kryetarit të Bashkisë, por me vendim të Këshillit Bashkiak, që Gjika e ka shpërfillur. Ky vendim pafajësie, ishte i dyti për Shpëtim Gjikën pas largimit nga detyra. Në 2014 Gjykata e Tiranës e Shkallës së parë dhe Apelit e deklaroi të pafajshëm Gjikën për akuzën e shpërdorimit të detyrës. Ndërkohë është nën hetim dhe për disa leje ndërtimi të dhëna gjatë kohës që drejtoi Bashkinë e Vlorës. /Tv Klan
Vlorë, Shpëtim Gjika shpallet sërish i pafajshëm
