Një incident jo i pazakontë tashmë për qytetin e Vlorës është shënuar natën e mbrëmshme. Pas reshjeve të ditëve të fundit, një palmë që ndodhej në anë të rrugës kryesore Vlorë-Skelë është rrëzuar e për pasojë ka lënduar një fëmijë të vogël, i cili rastësisht ndodhej aty pranë në ato momente.
Fatmirësisht, sipas të dhënave paraprake, fëmija është lënduar pak dhe nuk ka asnjë rrezik për jetën. Kalimtarë të rastit i kanë ardhur në ndihmë fëmijës, i cili fillimisht është trembur dhe është qetësuar me vështirësi.Mësohet se palma e rrëzuar ishte e kalbur në rrënjë prej thatësirës. Raste të tilla të ngjashme janë shënuar edhe më parë, e për pasojë kanë shkaktuar dëme të konsiderueshme materiale, sidomos kur rrëzohen mbi automjetet e parkuara pranë tyre.
