Policia e Vlorës zbuloi dhe asgjësoi 34 parcela me 3622 bimë narkotike të llojit kanabis sativa, ndërkohë që po punon për identifikimin e kultivuesve.
Burime zyrtare të policisë lokale bënë të ditur për ATSH-në se, parcelat me bimë narkotike u zbuluan gjatë operacioneve antikanabis në fshatrat Treblovë, Lubonjë, Gjorm, Kallarat e Tërbaç, respektivisht 20 km, 30 km, 50 km dhe 45 km në lindje dhe juglindje të qytetit të Vlorës.
Sipas policisë, për të realizuar qëllimin e tyre, kultivuesit kishin zgjedhur toka pa pronarë në zona të fshehura dhe në terren të vështirë, çka e vështirëson punën për identifkimin dhe kapjen e autorëve.
Aksioni i sotëm i policisë së Vlorës është pjesë e operacionit të gjerë antikanabis që ka filluar prej më shumë se 3 muajsh në shkallë vendi dhe që po intensifikohet në vazhdimësi, duke u shtrirë në të gjithë territorin, sipas një grafiku paraprak bazuar në veprimet përgatitore hetimore. Vetëm gjatë 8 ditëve të fundit janë zbuluar dhe asgjësuar më shumë se 150 parcela me më shumë se 30 mijë rrënjë kanabisi, ndërkohë që u shpallën në kërkim dy persona.
Në harkun kohor të më shumë se tre muajsh, policia e Vlorës ka zbuluar dhe asgjësuar të paktën 95 mijë bimë narkotike, ndërkohë që janë kapur apo shpallur në kërkim, më shumë se 20 persona, të dyshuar si kultivues të tyre.
