Kontrolli i Lartë i Shtetit, pasi ka audituar Bashkinë e Vlorës dhe Prefektura e këtij Qarku, për zbatimin e procedurave ligjore dhe miratimin me koncesion të administrimit të parkimit me pagesë në rrugë, ka dalë në përfundimin se ai është realizuar në shkelje të plotë të ligjit.
Sipas njoftimit të KLSH-së, u konstatuan shkelje të dispozitave të ligjit “Për Koncesionet dhe Partneritetin Publik-Privat”, “Për Pronat e Paluajtshme të Shtetit”, “Për Transferimin e Pronave të Paluajtshme Publike në Njësitë e Qeverisjes Vendore”.
Në shkeljet e vërejtura bie në sy fakti se Bashkia Vlorë me datë 12.01.2015, realizoi procedurën e dhënies me koncesion të parkimit në rrugë, në një kohë kur komisioni i dhënies me koncesion ka vepruar në kundërshtim me ligjin pasi operatori i vetëm pjesëmarrës dhe fitues i koncesionit nuk plotëson kriteret e përgjithshme dhe të veçanta të pranim/kualifikimit.
Për këto shkelje, KLSH i ka kërkuar Kryetarit të Bashkisë Vlorë, përmes përcjelljes së rekomandimeve me shkresën nr. 348/10, datë 30.06.2015, fillimin e procedurave ligjore për dhënien e masës disiplinore “Vërejtje me paralajmërim deri në largim nga Shërbimi Civil” të gjashtë punonjësve, konkretisht për tre zv/Kryetarë të Bashkisë A.M, I.B dhe A.B, për Drejtorin e Infrastrukturës G.SH, si dhe për dy specialistë të Bashkisë Vlorë M.M dhe P.TH.
Ndërkohë, nga pikëpamja e menaxhimit me efiçiencë, efektivitet dhe ekonomicitet të fondeve të qeverisjes vendore, ky koncesion i mohon bashkisë së qytetit bregdetar fonde të rëndësishme financiare, nëse kjo kontratë koncesionare zbatohet.
Sipas KLSH, nëse zbatohet kontrata koncesionare për parkimin me pagesë në rrugët e qytetit, impakti financiar negativ për Bashkinë Vlorë do të jetë i konsiderueshëm, ku vlera e të ardhurave të pritshme për të gjithë periudhën e koncesionit, e përllogaritur më pak nga Komisioni i Dhënies me Koncesion, është 218,360,000 lekë, ndërsa subjekti privat përfiton me të padrejtë shumën 184,479,120 lekë.
Po ashtu, Bashkia mund ta kryejë këtë shërbim shumë mirë vetë, ose me ndihmën e ndërmarrjeve të varësisë.
Në këtë kuadër, KLSH i ka rekomanduar Kryeministrit Edi Rama të anulohet ky koncesion si dhe të nisin procedurat ligjore për dhënien e masës disiplinore “Vërejtje me paralajmërim deri në largim nga detyra”, për Prefektin e Qarkut Vlorë E.H.
