Vlora përkujton 105-vjetorin e luftës, një ndër ngjarjet më të rëndësishme të historisë kombëtare, dhe për herë të parë në një aktivitet publik, Lufta e Vlorës ka bërë bashkë përfaqësues të Partisë Demokratike dhe Partisë Socialiste në nivel lokal.
Deputetët e të dyja partive morën pjesë në ceremoninë e përkujtimit duke nderuar veprën e të rënëve të luftës së vitit 1920.
“Është një moment historik, një moment që bashkoi të gjitha forcat pa asnjë lloj ndasie. Kur vjen puna për identitetin kombëtar, për pasurinë dhe lirinë tonë, ne jemi të gjithë bashkë përtej çfarëdolloj ndasie politike apo mendësie”, u shpreh kryebashkiaku i Vlorës, Ermal Dredha.
Në varrezat e dëshmorëve u përkujtuan veprat epopale të të rënëve. Ceremonia u ndoq nga familjarët dhe pasardhësit e heronjve të Vlorës, duke i dhënë një dimension të veçantë respektit për sakrificat e tyre.
“Është një nga përpjekjet e popullit tonë për liri, në përmasa kombëtare, që bashkë me shpalljen e Pavarësisë dhe me Kongresin e Lushnjës largoi njëherë e përgjithmonë idenë e kancelarive të huaja për copëtimin e Shqipërisë”, tha deputeti Vullnet Sinaj.
“Mirënjohje dhe lavdi për të gjithë kontribuesit e kësaj lufte, që me epopenë e tyre treguan që guximi, trimëria dhe bashkimi kombëtar mbizotërojnë mbi çdo gjë tjetër”, tha Klevis Kaso, kryetar i degës së PS-së në Vlorë.
Më 1920-ën nga Vlora nisi lëvizja e bashkuar e shqiptarëve për një Shqipëri të lirë nga Italia, luftë që u ndoq në dhjetëra qytete të tjera.
