Vlora Çitaku është emëruar ambasadore e re e Kosovës në Shtetet e Bashkuara të Amerikës. Lajmin e ka konfirmuar për median zëvendësministri i jashtëm i Kosovës, Petrit Selimi. Vlora Çitaku është ambasadorja e tretë e Kosovës në SHBA që prej shpalljes së pavarësisë.
Çitaku do ta pasojë ambasadorin aktual, Akan Ismajli. Ajo deri tani kryente punën e konsullit të përgjithshëm në Nju-Jork, transmeton koha.net. Vlora Çitaku ka qenë ministre e Integrimit Europian dhe ish-zëvëndsministre e Jashtme dhe ministre e Jashtme në detyrë pas prishjes së koalicionit PDK dhe LDK. Çitaku po ashtu ka qenë deputete në dy legjislatura nga radhët e Partisë Demokratike të Kosovës. Ka qenë e angazhuar në komisionet parlamentare për punë të jashtme dhe integrim europian. Ne zgjedhjet e fundit parlamentare ishte njëra nga kandidatët më të votuar në partinë e saj.
Çitaku ka të mbaruar një MA në Medie dhe Gazetari dhe para se të angazhohej në politikë ka punuar si gazetare dhe përkthyese për disa medie perëndimore gjatë luftës në Kosovë në periudhën 1998 – 1999.
