“Pushteti vendor dhe të drejtat e njeriut” është tema e Konferencës Vjetore të organizuar të enjten nga Avokati i Popullit, me praninë e diplomatëve të lartë të organizmave ndërkombëtarë, të akredituar në Tiranë.
Ambasadorja e BE-së, Romana Vlahutin, duke u ndalur tek rëndësia e luftës kundër korrupsionit, tha se njerëzit duhet të dinë për çfarë paguajnë dhe kjo bëhet përmes informacionit dhe transparencës.
“Qeverisjet lokale duhet të gjejnë mënyra për të integruar zonat rurale, për të menaxhuar më mirë shpenzimet dhe të gjetur mënyrat në tërheqjen e investimeve. Një element me rëndësi i qeverisjes së mirë është transparenca. Mekanizmat për kontrollin, të dhënat e buxheteve, planet e shpenzimeve për vitin e kaluar dhe aktual, informacion për prokurimet etj. Informacioni dhe transparenca mund të përmirësohen përmes reformave të decentralizimit”, tha ambasadorja Vlahutin.
Ndërsa ambasadori i OSBE-së, Florian Rauning, theksoi se qeverisja vendore ka nevojë për burime financiare dhe njerëzore për të përmbushur kompetenat e tyre për shërbime cilësore.
“Qeverisja e mirë vendore është mjeti për të pasur shërbime më të mira për qytetarët, se vlerat, politikat dhe institucionet e saj udhëhiqen nga parimet e të drejtave të njeriut, barazia dhe mosdiskriminimi, llogaridhënia dhe shteti i së drejtës”, tha Raunig. Qeverisjes vendore, shtoi ai, duhet t’i akordohen burimet financiare dhe njerëzore për të përmbushur kompetencat e tyre dhe për t’i ofruar qytetarëve shërbime cilësore.
