Më shumë se 150 fluturime në aeroportin londinez Gatwick dhe Heathrow anuluan destinacionin për në aeroporte të tjera për shkak të erërave të forta. Stuhija “Katie” me shpejtësi që i ka kaluar 100 kilometra në orë përfshiu jugun e Britanisë së Madhe.
“Për shkak të erërave të forta të shkaktuara nga stuhija “Katie”, u shënuan vonesa dhe disa anulime të udhëtimeve të sotme”, njoftoi aeroporti Heathrow, më i rëndësishmi i vendit, në web faqen në internet.
Sipas tabelës së fluturimeve të parashikuara deri në orën 13:00 GMT, rreth 50 fluturime që vijnë dhe më shumë se 80 të tjera në ikje u anuluan në këtë fundjavë të gjatë Pashkësh, që përkon gjithashtu me fillimin e pushimeve për britanikët.
Në aeroportin Gatwick, i cili shtrihet në jug të kryeqytetit britanik, rreth 20 fluturime që duhet të kishin mbërritur në mesditë u anuluan dhe katër të tjera u spostuan, sipas web faqes të aeroportit.
Zyra e shërbimit meteorologjik lëshoi një paralajmërim për erëra të forta në Londër dhe në jug-lindje të Anglisë, me nivelin e alarmit në ngjyrën portokalli, që ka përfshirë edhe jugun e Uellsit. Shpejtësia e erës i kalon 170 kilometra në orë të regjistruara në pjesën jugore të Anglisë.
Një urë e lumit Tamiz në jug-lindje të Anglisë dhe ura Severn që lidh Anglinë me Uellsin janë mbyllur gjithashtu, sipas shërbimit të autostradave të Anglisë.
Të paktën 2.000 shtëpi kanë mbetur aktualisht pa energji elektrike në Sussex, Surrey dhe në Kent (jug të Anglisë) për shkak të defekteve, sipas rrjetit të çentraleve elektrike në Britaninë e Madhe.
