Po të kesh një makinë dhe të ndodhesh në Shqipëri, duhet të ndihesh i sigurtë; gjasat që të të vjedhin janë thuajse minimale.
Të paktën këtë thonë të dhënat krahasuese mes atyre të Eurostat dhe atyre të Institutit të Statistikave. Sipas këtyre të dhënave, në kontinentin e vjetër vetëm një shtet tjetër raporton një numër më të vogël të vjedhjeve për makinë për banor, se sa vendi ynë, dhe ai vend është Danimarka.
Në të gjitha vendet e tjera shifra është bindshëm më e lartë, deri në 31 herë më shumë në rastin e Luksemburgut.
Sipas të dhënave të Eurostat, në Bashkimin Europian dhe vendet e Efta-s, mesatarja e vjedhjes së makinave përgjatë periudhës 2015-2017 për 100 mijë banorë varion nga 4, deri në 328, me vendet e Europës perëndimore që janë në krye të kësaj liste, ku siç duket nuk mungon as Italia, Greqia, Franca, Mbretëria e Bashkuar, Belgjika apo Holanda.
Pas analizimit të hollësishëm të të dhënave nga Instituti i Statistikave dhe përpunimit të tyre, rezulton se, në vendin tonë vjedhjet e automjeteve për 100 mijë banorë në periudhën 2015-2017 fiksohen në vetëm 10.4 për 100 mijë banorë. Në 2015 kjo shifër fiksohet në 9.6, në 2016 në 10.3 dhe në 2017 në 11.4.
Pra, ka ardhur në rritje, por sërish shumë larg niveleve të vendeve europiane. Sipas të dhënave të instat, në vitin 2015 u raportuan 277 vjedhje makinash, në 2016, 298 të tilla dhe në 2017, 329, raporton Scan.
Të paktën në këtë “garë”, jemi të fituar, dhe në Europë kemi vetëm një rivale, Danimarkën, vendi i vetëm më i sigurtë se ne, po të jesh pronari i një makine.
