A keni menduar ndonjëherë të hani mëngjesin në Shqipëri, të drekoni në Mal të Zi dhe ta mbyllni ditën me një darkë tradicionale në Kosovë, gjithçka përmes një ecjeje të vetme?
Ky nuk është skenar filmik, por realiteti i shtegut “Majat e Ballkanit”, një itinerar rrethor prej rreth 193 kilometrash që gjarpëron mes majave të thepisura të Bjeshkëve të Namuna.
Ky shteg prej rreth 193 kilometrash, që gjarpëron mes majave të thepisura të Alpeve Shqiptare, është kthyer në një ndër destinacionet më të lakmuara të botës për aventurierët.
Rrugëtimi 10-ditor përshkon Shqipërinë, Kosovën dhe Malin e Zi, duke nisur në Shqipëri nga Thethi për të vijuar në Valbonë, Çerem e Dobërdol.
CNN Travel e ka cilësuar këtë zonë si “shkretëtira e fundit e madhe e Europës”, një vend ku kufijtë shtetërorë bëhen të padukshëm përpara madhështisë së natyrës.
Nëse dikur këto zona mbaheshin të izoluara nga kufijtë dhe tensionet gjeopolitike të Luftës së Ftohtë, sot ato janë kthyer në një strehë paqeje dhe në një ndër destinacionet më të lakmuara të turizmit të aventurës në botë. I krijuar në vitin 2006 pikërisht si një shteg paqeje për të thyer ndarjet dhe për të afruar kulturat, ky itinerar sfidues me ngjitje të pjerrëta ofron pamje spektakolare të liqeneve akullnajore, pyjeve të dendura dhe livadheve plot lule.
Përveç aventurës dhe ajrit të pastër, rritja e turizmit po sjell përfitime të rëndësishme ekonomike për komunitetet lokale, duke shndërruar bujtinat e fshatrave malore në një burim të vyer jetese dhe duke dëshmuar se si natyra mund t’i bashkojë njerëzit përmes traditës dhe mikpritjes.
Sipas CNN, shtegu vazhdon të mbetet larg turizmit masiv. Sezoni kryesor zgjat nga qershori deri në shtator, ndërsa maji dhe tetori janë gjithashtu të mundshëm, megjithëse kushtet e motit mund të jenë më të vështira.
“Majat e Ballkanit” po shndërrohet kështu në një nga kartëvizitat e turizmit të aventurës në Shqipëri, duke bashkuar natyrën, traditën, mikpritjen dhe historinë e tre vendeve të Ballkanit në një itinerar unik.
