Presidenti turk, Recep Tayyip Erdogan fillon nesër një vizitë historike në Greqi, për të përmirësuar raportet mes dy vendeve fqinje, marrëdhëniet e të cilëve janë përkeqësuar nga mosmarrëveshje të shumta.
Gjatë kësaj vizite dyditore, i pari president turk që prej vitit 1952, Erdogan do të pritet në Athinë nga homologu grek, Prokopis Pavlopoulos dhe kryeministri, Alexis Tsipras dhe më pas do të vizitojë minoritetin mysliman të Thraces.
Mediat greke flasin për masat e tepruara të sigurisë të ndërmarra si nga autoritetet greke, ashtu dhe nga vetë stafi i Erdogan.
Kjo, pasi mbi 3 mijë efektivë të policisë greke kanë zbritur tashmë në rrugët e Athinës për të garantuar që çdo gjë të shkojë pa asnjë incident, ndërkohë që vetë “sulltani” ka angazhuar 200 operativë të gardës personale të tij.
Sidoqoftë, në vizitën e parë të një presidenti turk në Greqi, Erdogan do të diskutojë për marrëdhëniet dypalëshe, bashkëpunimin ekonomik, energjinë, emigracionin, marrëdhëniet Turqi-Evropë, zhvillimet rajonale dhe rreziqet që vijnë nga terrorizmi.
Një tjetër çështje “pikante” që presidenti turk do të ngrejë pritet të jetë ajo e dorëzimit të ushtarëve turq, të cilët u arratisën nga vendi i tyre gjatë reagimit të qeverisë së Ankarasë ndaj grushtit të supozuar të shtetit.
Gjithashtu, gjatë qëndrimit të tij në kryeqytetin helen është parashikuar edhe një konferencë për shtyp me kryeministrin Tsipras.
