Vizita e kryeministrit serb Aleksandër Vuçiç në Tiranë, e para e një shefi të qeverisë serbe në Shqipëri, do ta gjejë policinë e kryeqytetit në gatishmëri të plotë dhe ku pjesa më e madhe e akseve të rëndësishme do të jetë e bllokuar.
Plani i masave i publkiuar nga policia nis që nga ora 10:00 ku do të bllokohet hyrja për në autostradën Tiranë-Durrës. Gjithashtu, aksi Rinas-Qafë Kashar, mbikalimi i Kamzës, rruga e Durrësit, Sheshi “Skënderbej”, Bulevardi Dëshmorët e Kombit, Sheshi Nënë Tereza do të kenë kufizime gjatë vizitës dy ditore të Vuçiç në Tiranën zyrtare.
Policia e Tiranës i drejtohet me apel qytetarëve që në këto dy ditë të shmangin në masë lëvizjen me makina, por të përdorin më shumë transportin publik dhe motoçikletat për të mos krijuar trafik e probleme në qarkullimin rrugor.
Ndërkohë, prej dy ditësh në Tiranë kanë mbërritur agjentë të sigurisë së gardës serbe të cilët do të garantojnë personalisht sigurinë e kryeministrit Vuçiç. Ndërsa nga pala shqiptare, të angazhuar në terren do të jenë edhe shërbimet inteligjente si dhe drejtoria e Anti-terrorit në Policinë e Shtetit.
Masat për vizitën e Vuçiç janë përqendruar edhe në ambasadën serbe, e cila do të jetë e rrethuar nga efektivë të rendit.
Duke nisur nga sot në orën 23:59 nuk do të lejohet asnjë parkim në aksin rrugor: Rinas- Qafë Kashar, Sheshi “Shqiponja”, Rruga “Dritan Hoxha” (në të dyja senset) – Rruga e Durrësit, Sheshi Skënderbej, Bulevardi Dëshmorët e Kombit, Rruga “Ismail Qemali” (nga TVSH në drejtim të Liceut) – Rruga e Elbasanit deri tek Pallati i Brigadave.
