Kryeministri Edi Rama ndodhet në Gjermani, aty ku do të zhvillojë një vizitë dy ditore me ftesë të kancelarit gjerman Olaf Scholz. Fillimisht, ai do të takojë kryebashkiaken e Berlinit, Franziska Giffey, e më pas Presidentin Frank-Walter Steinmeier, si dhe kancelarin gjerman.
Mësohet se fokusi i diskutimit mes Ramës dhe Scholz do të jetë integrimi i Shqipërisë në Bashkimin Europian, lufta në Ukrainë dhe kriza e shkaktuar prej saj, si edhe çështje të tjera ekonomike dhe të politikës mes dy vendeve. Gjermania është një prej zërave më të fortë pro nisjes së bisedimeve për anëtarësimin e Shqipërisë në BE, dhe qëndrimi i saj është vendimtar në qershor kur vendi ynë pret një sinjal pozitiv nga Brukseli zyrtar.
Pas takimit, Rama dhe Scholz do të kenë një konferencë të përbashkët për shtyp me median, ndërsa fill pas saj, Rama do të ketë një deklaratë për mediat shqiptare. Pikërisht në orën 18:00, Rama do të takohet me Kancelarin gjerman, Olaf Scholz, e më pas në orën 18:15 do të zhvillojnë një konferencë të përbashkët për shtyp. Gjatë mesit të muajit mars, edhe kreu i Grupit Parlamentar të PS-së, Taulant Balla, i shoqëruar nga një delegacion i Parlamentit, zhvilloi një vizitë zyrtare në Gjermani. Gjatë takimeve, Balla kërkoi nga BE që të mbajë sa më parë Konferencën Ndërqeveritare me Shqipërinë dhe Maqedoninë e Veriut lidhur me hapjen e negociatave për integrim në BE.
AXHENDA
10.30 – Vizitë në ambientet e “Factory Berlin”
12.30 – Takim me znj. Franziska Giffey, kryetare e bashkisë së Berlinit
15.20 – Takim bilateral me z. Frank-Ëalter Steinmeier, President Federal i Gjermanisë
18.00 – Takim tete-a-tete me z. Olaf Scholz, Kancelar Federal i Gjermanisë
18.15 – Konferencë e përbashkët shtypi me z. Olaf Scholz, Kancelar Federal i Gjermanisë
Gjatë vizitës kryeministri shoqërohet nga Taulant Balla, Delina Ibrahimaj dhe Elisa Spiropali.
g.kosovari
