Ministrja e Infrastrukturës dhe Energjetikës, Belinda Balluku ka deklaruar se vizioni 20-30 i Partisë Socialiste është kthyer në udhërrëfyesin e vizionit të partisë.
Balluku e cilësoi infrastrukturën dhe energjinë si paketa bazë e zhvillimit. Ajo u shpreh se PS ka arritur që Korridori 8 të jetë pjesë e rrjeteve paneuropiane të transportit.
“Jemi ajo parti që dimë të qëndrojmë në ditë të vështira dhe mbështesim njëri-tjetrin dhe në momentet më decizive. Ne jemi partia e shqiptareve.
Në 2021, sërish në këtë sallë prezantuam vizionin e PS 20-30, i cili nuk ishte një titull fluturistik, dhe padyshim sot që flasim është kthyer në udhërrëfyes vizioni ynë, për ekipin që duhet të sjellë suksesin dhe që ka nisur tashmë zbatimin.
Ne flasim me vepra, punë. Paketa bazë e zhvillimit, që është infrastruktura dhe energjia dhe janë në funksion të zhvillimit ekonomik të vendit. Kemi nisur projekte të shumta që sot janë të prekshme, nga korridoret e rëndësishme të infrastrukturës, pan-europiane, sikurse është Korridori Blu.
Të gjitha kontratat që do vijojnë janë në faza të avancuara.
Kemi arritur që Korridori 8 të jetë pjesë e rrjeteve paneuropiane të transportit. Për të ndërtuar hekurudhat, mjeti i transportit të së ardhmes”, tha Balluku.
Ministrja u shpreh më tej se në buxhetin e vitit 2024, është parashikuar mirëmbajtja e 3606 km rrugë të cilat sipas saj, i hapin rrugë zhvillimit të sektorëve të tjerë, sikurse është turizmi dhe ekonomia.
“Ndërtohet në gjithë Shqipërinë. Ndërtojmë projekte të mirëstudiuara dhe të cilat mbështesin fushat e tjera ekonomike.
Duke rritur kapacitetet infrastrukturore të vendit, ne kemi mbështetur sektorin e turizmit, ekonomisë, kulturës dhe agroturizmit.
Në buxhetin e 2024 është parashikuar mirëmbajtja e 3606 km rrugëve. Ne bëjmë ndryshimin, jemi ata që shkojmë në çdo familje, që zgjidhim problemet.
Është detyra jonë të dëgjojë qytetarët pa dallim. Infrastruktura sot është moderne dhe përmban edhe zhvillimin e aviacionit civil”, tha ajo.
/a.r
