Kryetari i Lëvizjes Vetëvendosje, Visar Ymeri, ka dhënë intervistën e parë pas shpërthimit të një skandali të brendshëm në partinë e tij. Ai me këtë rast ka folur edhe për dorëheqjet që janë bërë në këtë parti kohëve të fundit. Ymeri e ka pranuar haptas se ka mbajtur fshehtë dorëheqjet e Albulena Haxhiut e Donika Kadajt.
Kryetari i VV’së, Visar Ymeri, e ka pranuar për herë të parë se e ka mbajtur sekret dorëheqjen që e kanë bërë nga kryesia e VV’së deputetet e kësaj partie, Albulena Haxhiu e Donika Kadaj.
Ai ka treguar se këto dorëheqje kanë ndodhur në muajin shtator të këtij viti, por që nuk janë bërë publike asnjëherë.
“Më janë ofruar mua si dorëheqje. Kjo ka ndodhur në muajin shtator, nuk kemi dashur t’i bëjmë publike. Këto dorëheqje kanë ardhur si rezultat i zhvillimeve në parti. Ato e kanë parë si te drejtë të japin dorëheqjeje”.
Ai ka thënë se mbajtja fshehtë e dorëheqjeve të tyre është bërë që mos të krijohen situata të këqija për VV’në.
“Në momentin që bëhet publike, kjo çështje fillon të flitet dhe për këtë s’kemi dashur ta bëjmë publike. Kjo është bërë mirë që nuk është bërë publike. Ne nuk kemi dashur që të zgjedhim këto probleme përmes publikimeve në publik”, ka thënë ai.
