Spitalet rajonale në rrethe kanë marrë masa për t’iu përgjigjur çdo rasti të rëndë që mund t’u paraqitet nga virusi i gripit dhe i ftohti.
Në Korçë dhe Kukës, spitalet thonë se deri më tani kanë mundur të përballojnë çdo urgjencë, ndërkohë që po bëhen dhe furnizimet e vazhdueshme me medikamente.
I ftohti polar që ka përfshirë vendin tonë prej disa ditësh, ka sjellë një situatë të rënduar në spitalet e disa rretheve. Në Korçë, drejtues të spitalit rajonal thonë se po përballen me dy emergjenca, gripin AH3N1, dhe kushtet atmosferike, ku temperaturat ditën e dielë shënuan rekord -17 gradë celcius.
Edlira Bode, drejtore e Spitalit Rajonal të Korçës: Janë të sëmurët kronikë që rëndohen qoftë nga kushtet atmosferike qoftë nga një mbivendosje e infeksionit viral, por jo gjithmonë mund të bëhet një dallim. Temperaturat e ulëta e përkeqësojnë një sëmundje kronike. Duhet të them që në këtë epidemi gripi kemi vënë re më shumë raste të lehta më të gjitha simptomat e sëmundjes virale por me pak komplikacione.
Në Kukës, spitali rajonal është në gjendje gatishmërie, pasi qyteti verilindor, ditët e fundit, është ndër më të goditurit nga i ftohti arktik që ka përfshirë vendin.
Hasije Zeneli,Drejtoreshe e Spitalit Rajonal Kukes: Kemi mungesa, por aktualisht mjekët kanë qëndruar 24 orë në spital dhe e kanë përballuar situatën.
Më herët drejtues të lartë të shëndetësisë si edhe shtabi i përgjithshëm i emergjencave u bëri thirrje qendrave shëndetësore në të gjithë vendin, që të marrin masat për të përballuar çdo rast që mund të paraqitej në këto ditë të ftohta dimri. /Oranews/
