Kryeministri Edi Rama teksa ka kërkuar të tregohet kujdes nga pandemia dhe të sillemi sikur e kemi virusin, pasi mund të rrezikojmë përhapjen e tij tek të afërmit, tregoi rastin e vëllait të shokut të tij, i cili e humbi betejën me Covid-19.
Rama tha se e njihte personalisht dhe ai ishte i ri.
“Jo më larg se dje unë dëgjova për një person që e kam njohur personalisht, vëllai i një shokut tim që humbi jetën e nuk ishte në një moshë shumë të madhe, ishte i ri. Askush nuk e përcakton dot deri në fund se si dhe pse virusi bën gjëmën tek dikush dhe shfaqet në mënyrë komplet të padukshme te dikush tjetër.
Problemi është që shumë nga ne mund ta marrin e se marrin vesh që e kanë, s’ndiejmë asgjë, vazhdojmë jetën normalisht, e prandaj duhet të sillemi sikur e kemi virusin se ia kalojmë familjarëve, miqve e shokëve“, tha kryeministri Edi Rama.
Deklarata e shefit të qeverisë u bë nga Durrësi, në një takim me nxënësit dhe mësuesit e shkollës “Leonik Tomeo”, për mënyrat se si do të zhvillohet mësimi këtë sezon.
Gjatë fjalës së tij, Rama u shpreh, duke vënë rëndësinë te mbajtja e maskave, se fëmijët e të rinjtë janë transmetues të virusit. Edhe pse mund ta kalojnë pa pasoja, mund t’ua kalojnë atyre më të rrezikuarve.
Po ashtu, kreu i qeverisë tha se masat për vitin e ri shkollor janë marrë, por shtoi ai, e gjitha varet nga njerëzit. Rama pranoi se me hapjen e shkollave, numrat do rriten, por theksoi që rëndësi ka që shifrat të jenë të përmbajtshme.
“Një shkollë e tërë mund të mbyllet nëse kthehet në një vatër…Besoj se është bërë një punë shumë e mirë nga ana e mësuesve që kanali i shkollës të jetë një burim shumë i mirë informacioni. Duhet të bëni kujdes jashtë shkollës. Duhen refuzuar opinionet që ky është një grip i rëndomtë, që është një sajesë..Faktkisht çdo ditë njerëzit po ndahen nga jeta. Fatmirësisht numri i fataliteteve nuk është në tërësinë e vet, më i madh në mënyrë të ndjeshme, saç ka qenë vitin e shkuar…”
