Në këtë mot të nxehtë ku mungojnë ngjarjet politike, por edhe ato të krimit të organizuar, një tjetër seri ngjarjesh që i përkasin zhanerit gjysmë thriller, gjysmë horror, po zhvillohet në botën e vipave dhe vipeshave shqiptare.
Në një hark kohor të shkurtër, disa prej emrave të njohur të showbizz dhe televizionit, ose kanë përfunduar prapa hekurave ose janë në kërkim nga policia.
Fillimisht ngjarja që bëri bujë ishte rrahja barbare e një personazhi, që njihet prej Tik-Tokut dhe quhet Medi Iseni. Një video e publikuar në rrjetet sociale, tregonte se si ky person ishte goditur brutalisht nga një numër djemsh në një diskotekë të Pejës. Sipas autoriteteve kosovare, pjesë e dhunës kanë qenë dy vipat shumë të njohur shqiptar, Rigels Rajku dhe Arkimed Lushaj, që përdorin nofkat, Noizy dhe Stresi.
Noizy ndodhet në qeli dhe Kosova kërkon me padurim ekstradimin e tij, ndërkohë që Stresi është në kërkim dhe ka paralajmëruar autoritetet që as mos e çojnë në mendje që t’i afrohen. Po kështu Stresi ka lëshuar disa mesazhe edhe për ministren e Drejtësisë në Kosovë, të cilës i shtron pyetjen “a jeni normal?”
Nga arratia, Arkimedi, shkruan statuse të ndryshme dhe i jep “zemër” edhe shokut të tij Noizy, i cili ndodhet prej ditësh, brenda katër mureve të qelisë.
Sëbashku me Noizyn, është arrestuar edhe një tjetër personazh me emrin Bahtjar Bajraktari, i njohur si Dj Crax, vip ky më pak i njohur se dy të parët.
Lidhur me arrestimin e Noizyt, kanë reaguar të indinjuar dhe me protestë të thellë, një numër i konsiderueshëm artistësh dhe vipash të tjerë shqiptarë, që kërkojnë lirimin e tij dhe e quajnë ndalimin të padrejtë. Ende nuk ka patur reagime nga ndonjë vip estrade, që të dënojë dhunën.
Nuk kaluan shumë ditë dhe një tjetër ngjarje, këtë herë me vipesha gra, u regjistrua në një restorant të Tiranës. Dy motrat Antonela dhe Mariela Berisha, janë shpallur në kërkim nga policia, pasi dyshohet se kanë dhunuar barbarisht me shishe qelqi, Klea Prengën. Pamjet horror të fytyrës së përgjakur dhe masakruar të Prengës, bën xhiron e mediave dhe rrjeteve sociale. Zyrtarisht nuk dihet pse mund të ketë ndodhur kjo ngjarje, por portalet ia kanë faturuar dashurisë së madhe dhe rivalitetit për një burrë!
Antonela Berisha është personazh i famshëm në Shqipëri, pasi ka marrë pjesë në programet shumë të njohura, Përputhen dhe Big Brother Vip, dy “fabrika” të mirëfillta vipash në vitet e fundit në Shqipëri. Ndërsa Mariela Berisha është motra e Antonelës.
Pra në harkun kohor të pak ditëve, bota e vipave dhe vipesha shqiptare, është tronditur nga akuzat për dhunë barbare, për motive krejt banale. Ata rrahin njëri tjetrin dhe pastaj indinjohen tej mase kur policia i shpall në kërkim.
Zakonisht elita e artistëve të një vendi, tregon shumë edhe për përbërjen dhe gjendjen e popullsisë në përgjithësi. Shpresojmë që ky të mos jetë rasti për vendin tonë, pasi situata nuk duket aspak optimiste në kampin e vipave.
tpz
