Fredi Beleri dhe deputetët e tjerë të Parlamentit Europian janë takuar këtë të martë me grupet parlamentare të Partisë Socialist edhe ato të opozitës, veçmas.
PS njoftoi se në takimin me grupin parlamentar të maxhorancës u diskutua për sundimin e ligjit dhe luftën kundër krimit dhe korrupsionit; lirinë e medias dhe zgjedhjet; zhvillimin ekonomik dhe turizmin; marrëdhëniet e mira fqinjësore dhe bashkëpunimi rajonal.
Niko Peleshi, në emër të grupit parlamentar, vlerësoi rolin e Kuvendit dhe të këtij komiteti në promovimin dhe monitorimin e reformave për avancimin e Shqipërisë drejt standardeve europiane. Ai theksoi rëndësinë historike të këtij momenti në marrëdhëniet me Bashkimin Europian, si rezultat i angazhimit serioz të Shqipërisë në reformat europiane.
“Hapja e kapitujve është një arritje e madhe, duke shënuar një gur themeli historik në rrugëtimin tonë drejt ribashkimit të plotë europian. Çdo sukses në këtë proces është një hap përpara jo vetëm për ne, por për të gjithë rajonin”, u shpreh Peleshi.
Në këtë takim, kreu i Grupit Parlamentar Socialist konfirmoi angazhimin e Partisë Socialiste për të bërë çdo përpjekje të mundshme në ndjekjen e agjendës së reformave europiane.
/a.r
