Shndërrohet në një histori pa mbarim ajo e Erjonit dhe Almës, çifti i bërë i njohur në rrjetet sociale. I vënë në pranga prej 3 ditësh tashmë, 35-vjeçari Erjon Sulohoxha kërkon nga qelia e paraburgimit në Komisariatin e Fierit që të takohet me të dashurën e tij.
Edhe pse ishte pikërisht 39-vjeçarja që e denoncoi për dhunë fizike e psikologjike të vazhdueshme, i dashuri i saj kërkon nga qelia që ta falë sërish.
“Unë dua ta takoj Almën. Nuk do ta dhunoj më. I premtoj edhe kësaj here. Dua të më falë e të më takojë këtu në burg”, mësohet të jetë shprehur Sulohoxha nga Policia e Fierit, raporton “Panorama”. Por burime të Komisariatit thonë se nuk është bërë e mundur kjo kërkesë e tij.
Nga kontakti që kanë pasur me denoncuesen, të dashurën dhe bashkëjetuesen e 35-vjeçarit për gati 5 muaj, ajo ka refuzuar që të ketë më lidhje me të. Alma N., e cila ka dy fëmijë nga martesa e parë, ka thënë në polici se nuk do të ketë më kontakt me Erjonin, i cili e dhunoi sërish javën e shkuar.
Çifti dha premtim në publik se do të vazhdonin të jetonin një marrëdhënie normale, por 35-vjeçari, gjithashtu me një martesë të mëparshme, e ka shkelur premtimin. Në kushtet e alkoolit ai e ka dhunuar sërish 39-vjeçaren dhe ajo e ka braktisur. Ai e ka gjetur dhe e ka dhunuar keqas, duke bërë që gruaja të përfundojë e dhunuar në spital e tashmë të marrë mjekim në kushtet e shtëpisë.
Me gjithë premtimin që i bën nga qelia 35-vjeçari, ajo ka refuzuar që ta takojë apo të interesohet për të. Pritet që sot Erjon Sulohoxha të paraqitet në Gjykatën e Fierit për të mësuar masën e sigurisë ndaj tij.
Prokuroria ka ngritur akuzën e dhunës në familje, pas denoncimit të bërë nga 39-vjeçarja se bashkëjetuesi i saj e dhunonte fizikisht dhe psikologjikisht prej disa muajsh. Erjoni dhe Alma u njohën rreth 5 muaj më parë në qytetin e Fierit.
Të dy kanë nga dy fëmijë nga martesat që kanë pasur më herët. Erjoni është i lindur në Berat dhe jeton në Fier, ndërsa familja e Almës në Lezhë. Në kohën kur 39- vjeçarja punonte si kameriere në Fier, aty është njohur me 35-vjeçarin./a.m.
