Shtetet e Bashkuara kanë akuzuar sot Kinën se ka sulmuar nëpërmjet hakerave, kompani të ndryshme farmaceutike në gjithë botën, të cilat po punojnë për zbulimin e një vaksine kundër Covd-19.
Dy shtetas kinezë janë paditur nga Departamenti Amerikan i Drejtësisë për përpjekjen për vjedhjen e studimeve mbi vaksinat kundër koronavirusit, duke hakuar qindra kompanive në SHBA dhe jashtë saj. Konkurentët për gjetjen e vaksinës përfshijnë emrat e kompanive të njohura si “GlaxoSmithKline”, “Johnson & Johnson”, “Sanofi”, “Imperial College “dhe Instituti “Jenner” i Universitetit të Oksfordit, të cilat kanë rënë të gjitha pre e sulmeve.
Li Xiaoyu, 34 vjeç, dhe Dong Jiazhi, 33 vjeç, të cilët besohet se ndodhen momentalisht në Kinë, vepruan në disa raste “për përfitimin e tyre personal” dhe në të tjera për të mirën e Ministrisë së Sigurisë së Shtetit të Kinës, tha një zyrtar i Departamentit të Drejtësisë, John Demerts
“Kina ka zënë vendin e saj, së bashku me Rusinë, Iranin dhe Korenë e Veriut, në klubin e turpshëm kombeve që ofrojnë një strehë të sigurt për kriminelët në internet,” tha Demers.
Disa orë pas akuzës së SHBA, ambasadori i Kinës në Mbretërinë e Bashkuar, Liu Xiaoming, hodhi poshtë pretendimet nga perëndimi se Kina po vidhte të dhënat e vaksinës si “të pabaza”. “Akuza të tilla janë mos respekt ndaj shkencëtarëve kinezë dhe arritjeve të tyre; ato gjithashtu mund të minojnë bashkëpunimin ndërkombëtar për koronavirusin. Bota duhet të kundërshtojë me forcë dhe të hedhë poshtë pretendime të tilla të pabaza ”, tha ai.
Masa vjen në mes të tensioneve në rritje midis superfuqive globale, të ushqyera më tej edhe nga pandemia, për të cilën Presidenti Donald Trump fajëson Kinën.
Departamenti i Drejtësisë tha se Li dhe Dong, të cilët ishin shokë klase në një kolegj të inxhinierisë elektrike në Chengdu, kanë sulmuar kompanitë amerikanë vazhdimisht gjatë dekadës së fundit.
Ata kanë synuar ndërmarrje edhe në Australi, Belgjikë, Gjermani, Japoni, Lituani, Holandë, Spanjë, Korenë e Jugut, Suedi dhe Britani.
“Industritë e synuara përfshijnë, ndër të tjera, prodhimin e teknologjisë së lartë; pajisjeve mjekësore, inxhinierisë civile dhe industriale; programe biznesi, energji diellore, apo kompanie farmaceutike, “thotë Departamenti Amerikan i Drejtësisë.
Zyrtarët e Departamentit të Drejtësisë thanë që Li dhe Dong kishin në shënjestër kompanitë bioteknike në Kaliforni, Maryland, Massachusetts, por nuk duket se kishin kompromentuar asnjë studim për vaksinën kundër Covid-19.
Aktakuza gjithashtu akuzon hakerat se kishin në shënjestër organizata joqeveritare, disidentë dhe aktivistë të të drejtave të njeriut në Shtetet e Bashkuara dhe Kinë.
Sipas aktakuzës, Li dhe Dong i dhanë Ministrisë kinezë të Shtetit fjalëkalime për llogari të postave personale që i përkisnin disidentëve kinezë, apo organizatorëve të protestave në Hong Kong.
Njoftimi për aktakuzën vjen ndërkohë që Sekretari amerikan i Shtetit, Mike Pompeo, u takua me kryeministrin britanik, Boris Johnson për të diskutuar shqetësimet për veprimet kineze brenda dhe jashtë vendit, përfshirë shkeljet e të drejtave të njeriut.
Zëvendës Drejtori i Byrosë Federale të Hetimeve (FBI), David L. Boëdich, tha në një konferencë për mediat në Uashington se, aktakuza i vë në dijeni udhëheqësit kinezë se hakimi i pronës intelektuale, që ndodh me mbështetjen e shtetit, do të ketë “pasoja serioze “.
Zyrtarët e sigurisë amerikane, britanike dhe kanadeze paralajmëruan po ashtu më 17 korrik se hakerët rusë gjithashtu po synonin organizatat e përfshira në zhvillimin e vaksinës kundër koronavirusit.
