Tre kandidatë të tjerë në listat shumëemërore të Partisë Demokartike kanë dorëzuar sot formularin e vetëdeklarimit në Komisionin Qendror të Zgjedhjeve.
Përmes këtij hapi, Krenar Rryçi dhe Kostaq Papa shkojnë drejt marrjes së mandatit të deputetit, duke u bërë kështu emrat e rinj që i shtohen opozitës në Kuvendin e Shqipërisë.
Mësohet se Krenar Rryçi vjen nga lista e PD në Qarkun e Durrësit, ndërsa Kostaq Papa nga ajo e Tiranës.
Formularin e dekriminalizimit e ka dorëzuar edhe Ares Ypi, nga PD Tiranë, edhe pse ditën e djeshme përmes një postimi në Facebook ai shprehej se nuk do ta pranonte mandatin.
Megjithatë mbetet i paqartë fakti përse Ypi e ka dorëzuar sot formularin e dekriminalizimit.
Postimi i Ypit:
Të dashur miq,
Si i ri dhe si demokrat, jam i qartë për sfidat që ka në këtë moment Shqipëria dhe për rolin që secili prej nesh duhet të luaj për të mbrojtur demokracinë dhe ëndrrën tonë për Shqipërinë si gjithë Europa. Komisioni Qendror I Zgjedhjeve më ka dërguar njoftimin për marrjen e mandatit të deputetit si kandidat në listën e Partisë Demokratike. Në një situatë normale, ky do ishte një privilegj i jashtëzakonshëm, për të përfaqësuar interesat e demokratëve dhe qytetarëve në Kuvendin e Shqipërisë.
Por, sot Kuvendi nuk përfaqëson qytetarët, nuk është i zgjedhur nga qytetarët, dhe nuk mund të shërbejë si forum për të mbrojtur interesat e qytetarëve. Gjithmonë kam vlerësuar se vendimi i Partisë Demokratike për djegien e mandateve, ishte vendimi më i drejtë që ka marrë Partia që nga dita e themelimit. Ne demokratët, nuk mund të jemi fasadë në Kuvend.
Me qartësinë e një të riu dhe me vullnetin tim të plotë, sot kam dorëzuar në KQZ, refuzimin për të marrë mandatin e deputetit dhe kam vendosur të jem krah qytetarëve në betejën e tyre historike për Shqipërinë si gjithë Europa.
/a.rada
