LSI vazhdon të shpërbëhet nga veriu në jug. Një valë e madhe largimesh ka nisur prej javësh ku anëtarët e këshillave bashkiakë të LSI-së, janë larguar përfundimisht nga kjo forcë politike duke u bashkuar me Partinë Socialiste.
Arsyeja kryesore është kursi politik i ndjekur nga PD-LSI, sipas asaj që thonë vetë të larguarit.
Pas Tiranës, Vlorë, Fierit, Shkodrës, Belshit, Skraparit, Gjirokastrës etj, ditën e sotme edhe anëtarët e këshillit bashkiak të LSI në Pukë kanë marrë të njëjtin vendim, atë të largimit nga LSI drejt PS-së.
Me anë të një deklarate për mediat, këshilltarët e Pukës theksojnë se koalicioni anti perëndimor LSI-PD është kthyer tashmë në një koalicion anti shqiptar që me para të errëta kërkojnë të vënë në jetë një skenar ogurzi për Shqipërinë.
Nga ana tjetër ata deklarojnë se “Kemi kërkuar votën e qytetarëve të Pukës që tu shërbejmë interesave të qytetit dhe jo interesave të influencave të huaja. LSI në Pukë është kthyer shpesh kundër interesave të qytetit madje duke tentuar dhe bllokimin e një sërë projektesh që e kanë transformuar rrënjësisht Pukën gjatë këtyre viteve.”
Në fund të deklaratës së tyre, ata i bëjnë thirrje anëtarëve të LSI-së në këshillat bashkiakë në të gjithë vendin që të bojkotojnë masivisht aleancën e turpit dhe të mos vihen në shërbim të kësaj aleance antishqiptare e anti kombëtare që nuk kanë asgjë të përbashkët me të ardhmen evropiane të Shqipërisë.
Deklaratë për shtyp – Këshilltarët e LSI, Pukë
Gati 3 vite më parë ne zgjodhëm që në siglën e LSI-së të bëhemi pjesë e Këshillit Bashkiak të Pukës me shpresën e madhe se vendi do të jetësonte shpejtë ëndrrën për një Shqipëri si gjithë Evropa. Por për fat të keq LSI dhe PD e harruan zotimin dhe hodhën pas krahëve ëndrrën e pukianëve dhe të gjithë shqiptarëve duke u investuar në një kthim të fuqishëm kursi nga e shkuara dhe jo nga e ardhmja evropiane.
LSI u ngrit si një forcë që në themel kishte integrimin e Shqipërisë në BE, realizimin e reforma transformuese për vendin, dhe jo një Rusi që shtrinë influenca dashakeqe dhe që kërkojnë ta kthejnë vendin në një teatër përplasjesh dhe destabiliteti. Koalicioni anti perëndimor LSI-PD është kthyer tashmë në një koalicion anti shqiptar që me para të errëta kërkojnë të vënë në jetë një skenar ogurzi për Shqipërinë.
Kemi kërkuar votën e qytetarëve të Pukës që tu shërbejmë interesave të qytetit dhe jo interesave të influencave të huaja. LSI në Pukë është kthyer shpesh kundër interesave të qytetit madje duke tentuar dhe bllokimin e një sërë projektesh që e kanë transformuar rrënjësisht Pukën gjatë këtyre viteve.
Deklarojmë sot përfundimisht largimin nga grupi i këshilltarëve të LSI, largimin nga politika anti shqiptare e Lulëzim Bashës dhe të koalicionit LSI-PD të bekuar nga qarqet rusefile që kërkojnë të marrin peng të ardhmen evropiane të Shqipërisë.
Gjejmë rastin që ti bëjmë thirrje të gjithë këshilltarëve të tjerë të LSI në të gjithë njësitë administrative të vendit të bojkotojnë masivisht aleancën e turpit dhe të mos vihen në shërbim të kësaj aleance antishqiptare e anti kombëtare që nuk kanë asgjë të përbashkët me të ardhmen evropiane të Shqipërisë.
Faleminderit!
